పెట్రోల్, డీజిల్ ధరలు క్రమంగా పెరుగుతుండటంతో వాహనం కొనుగోలు చేసే వారి ఆలోచనా విధానంలో గణనీయమైన మార్పు కనిపిస్తోంది. ఒకప్పుడు ఎలక్ట్రిక్ కార్లపై సందేహాలు వ్యక్తం చేసిన వినియోగదారులు ఇప్పుడు వాటినే తొలి ఎంపికగా పరిగణిస్తున్నారు. తక్కువ నిర్వహణ ఖర్చులు, ప్రతి కిలోమీటర్‌కు తక్కువ ప్రయాణ వ్యయం, ప్రభుత్వ ప్రోత్సాహకాలు, ఛార్జింగ్ మౌలిక సదుపాయాలు విస్తరిస్తుండటం వంటి అంశాలు ఎలక్ట్రిక్ వాహనాల వైపు కొనుగోలుదారులను ఆకర్షిస్తున్నాయి. ఈ పెరుగుతున్న డిమాండ్‌ను దేశీయ ఆటో దిగ్గజం టాటా మోటార్స్ (Tata Motors) అత్యంత సమర్థంగా వినియోగించుకుంటూ భారత ఎలక్ట్రిక్ కార్ల మార్కెట్‌లో తన ఆధిపత్యాన్ని మరింత బలోపేతం చేస్తోంది.

ఇటీవల విడుదలైన సేల్స్ ప్రకారం, 2026 జూన్ నెలలో టాటా మోటార్స్ దేశవ్యాప్తంగా మొత్తం 12,077 ఎలక్ట్రిక్ కార్లను విక్రయించింది. గత ఏడాది ఇదే నెలలో నమోదైన అమ్మకాలతో పోలిస్తే ఇది ఏకంగా 124.7 శాతం వృద్ధి. ఒక్క ఏడాదిలోనే ఇంత భారీ స్థాయిలో విక్రయాలు పెరగడం భారత ఈవీ మార్కెట్ ఎంత వేగంగా విస్తరిస్తోందో స్పష్టం చేస్తోంది. అదే సమయంలో టాటా తన స్థానాన్ని మరింత పటిష్టం చేసుకుంది.

టాటా మోటార్స్ ఇప్పటికే పలు ధరల్లో ఎలక్ట్రిక్ కార్లను అందుబాటులో ఉంచడం, వినియోగదారుల అవసరాలకు అనుగుణంగా కొత్త మోడళ్లను పరిచయం చేయడం, బ్యాటరీ టెక్నాలజీతో పాటు ఫీచర్లలో కూడా నిరంతరం మెరుగుదలలు తీసుకురావడం వల్ల కంపెనీపై కొనుగోలుదారుల విశ్వాసం మరింత పెరిగింది. నగర ప్రయాణాల నుంచి కుటుంబ అవసరాల వరకు అన్ని రకాల వినియోగదారులను దృష్టిలో ఉంచుకుని రూపొందించిన ఈవీ పోర్ట్‌ఫోలియో టాటా అమ్మకాల పెరుగుదలకు ప్రధాన కారణంగా నిలుస్తోంది.

ప్రస్తుతం టాటా మోటార్స్ భారత మార్కెట్లో మొత్తం 7 ఎలక్ట్రిక్ కార్లను విక్రయిస్తోంది. కంపెనీ లైనప్‌లో టియాగో EV, పంచ్ EV, టిగోర్ EV, నెక్సాన్ EV, కర్వ్ EV, సియెర్రా EV, హారియర్ EV మోడళ్లు ఉన్నాయి. వీటిలో టియాగో EV ప్రారంభ ఎక్స్-షోరూమ్ ధర రూ. 6.99 లక్షలు కాగా, BaaS పథకం ద్వారా కొనుగోలు చేస్తే ప్రారంభ ధర రూ. 4.69 లక్షలకు తగ్గుతుంది.

అయితే ఈ పథకాన్ని ఎంచుకున్న వినియోగదారులు బ్యాటరీ వినియోగానికి కిలోమీటరుకు రూ. 2.60 చెల్లించాల్సి ఉంటుంది. టియాగో EV తర్వాత అందుబాటు ధరలో లభించే మోడల్ టాటా పంచ్ EV. దీని ప్రారంభ ధర రూ. 9.69 లక్షలు. BaaS పథకం కింద కొనుగోలు చేస్తే ప్రారంభ ధర రూ. 6.49 లక్షలకు వస్తుంది. అయితే ఈ పథకంలో కూడా బ్యాటరీ వినియోగానికి కిలోమీటరుకు రూ. 2.60 చెల్లించాలి.

ఇటీవలే టాటా మోటార్స్ టియాగో EV, పంచ్ EVలకు అప్‌డేటెడ్ ఫేస్‌లిఫ్ట్ వెర్షన్లను మార్కెట్లోకి తీసుకొచ్చింది. మరోవైపు టాటా టిగోర్ EV ప్రారంభ ధర రూ. 12.49 లక్షలు. ఈ మోడల్‌కు ప్రస్తుతం BaaS ఆప్షన్ అందుబాటులో లేదు. అలాగే దీని ఫేస్‌లిఫ్ట్ వెర్షన్ త్వరలో భారత మార్కెట్లోకి రానుంది. ఇదే ధరతో ప్రారంభమయ్యే మరో ఎలక్ట్రిక్ SUV టాటా నెక్సాన్ EV. దీనికీ BaaS సదుపాయం లేదు.

టాటా కర్వ్ EV ప్రారంభ ధర రూ. 16.99 లక్షలు. టాటా సియెర్రా EV ప్రారంభ ధర రూ. 18.79 లక్షలు కాగా, కంపెనీ ఫ్లాగ్‌షిప్ ఎలక్ట్రిక్ SUV అయిన టాటా హారియర్ EV ప్రారంభ ధర రూ. 21.69 లక్షలు. ఈ మూడు మోడళ్లకు కూడా ప్రస్తుతం BaaS పథకం అందుబాటులో లేదు. ఈ కథనంలో పేర్కొన్న అన్ని ధరలు టాటా మోటార్స్ అధికారిక ఎక్స్-షోరూమ్ ధరలు మాత్రమే.