భారతదేశపు అతిపెద్ద కార్ల తయారీ సంస్థ మారుతి సుజుకి (Maruti Suzuki) దేశీయ మార్కెట్లో తన పట్టును మరింత బలోపేతం చేసుకోవడానికి సరికొత్త వ్యూహాలతో సిద్ధమైంది. ఇటీవల విడుదల చేసిన ఎలక్ట్రిక్ ఎస్‌యూవీ ఈ విటారా (e Vitara) ఆశించిన స్థాయిలో వేగాన్ని అందుకోలేకపోయినప్పటికీ, కంపెనీ ఏమాత్రం తగ్గడం లేదు. రాబోయే 12 నెలల కాలంలో ఏకంగా ఐదు సరికొత్త మోడళ్లను మార్కెట్లోకి లాంచ్ చేయడానికి మారుతి సంస్థ అంతా సిద్ధం చేసుకుంది. ఈ జాబితాలో ఇప్పటికే పాపులర్ అయిన కార్ల ఫేస్‌లిఫ్ట్ వెర్షన్ల నుంచి, సరికొత్త హైబ్రిడ్, పూర్తి ఎలక్ట్రిక్ వాహనాలు కూడా ఉన్నాయి.

1. సరికొత్త మారుతి బ్రెజ్జా ఫేస్‌లిఫ్ట్ (New Maruti Brezza Facelift)
మారుతి సుజుకి తన మోస్ట్ పాపులర్ కాంపాక్ట్ ఎస్‌యూవీ బ్రెజ్జాను సరికొత్త హంగులతో మార్కెట్లోకి తీసుకురాబోతోంది. రాబోయే జులై 23న ఈ కొత్త బ్రెజ్జా ఫేస్‌లిఫ్ట్ వెర్షన్ లాంచ్ కానుంది. ఈ కారు ఎక్స్‌టీరియర్ డిజైన్‌లో సరికొత్త బంపర్లు, అప్‌డేటెడ్ హెడ్‌లైట్లు, టెయిల్ ల్యాంప్స్, కొత్త 16-ఇంచుల అల్లాయ్ వీల్స్ అందించనున్నారు.

ఇక ఇంటీరియర్ విషయానికి వస్తే, ఇందులో 10.1-ఇంచుల పెద్ద టచ్‌స్క్రీన్ ఇన్ఫోటైన్‌మెంట్ సిస్టమ్, వెంటిలేటెడ్ ఫ్రంట్ సీట్లు, డ్రైవర్ సైడ్ పవర్ అడ్జస్ట్‌మెంట్ వంటి ప్రీమియం ఫీచర్లు ఉండబోతున్నాయి. సేఫ్టీ కోసం ఇందులో లెవెల్-2 ఏడీఏఎస్ (ADAS) టెక్నాలజీని కూడా జోడించనున్నారు. అన్నింటికంటే ముఖ్యంగా ఇందులో కొత్త 1.0-లీటర్ టర్బోచార్జ్డ్ పెట్రోల్ ఇంజిన్‌ను ప్రవేశపెట్టే అవకాశం ఉంది. దీనివల్ల పన్ను తగ్గి, కారు ధర కస్టమర్లకు మరింత అందుబాటులోకి రానుంది.

2. న్యూ జనరేషన్ మారుతి బలెనో ఫేస్‌లిఫ్ట్ (New Maruti Baleno Facelift)
ప్రీమియం హ్యాచ్‌బ్యాక్ సెగ్మెంట్లో రారాజుగా వెలుగుతున్న మారుతి బలెనో కూడా సరికొత్త లుక్‌తో మెరిసిపోవడానికి సిద్ధమవుతోంది. బ్రెజ్జా లాంచ్ అయిన కొద్ది రోజులకే, అంటే ఇదే ఏడాది చివర్లో ఈ కొత్త బలెనో మార్కెట్లోకి రానుంది. ఇప్పటికే ఈ కారుకు సంబంధించిన టెస్టింగ్ మోడల్ రోడ్లపై కనిపించింది. కొత్త బలెనోలో రీడిజైన్ చేసిన అప్పర్ గ్రిల్, కాస్త మార్పులు చేసిన ఫ్రంట్ బంపర్ ప్రధాన ఆకర్షణగా నిలవనున్నాయి.

అయితే కారు హెడ్‌లైట్లు, ఇంటీరియర్ లేఅవుట్‌లో కంపెనీ పెద్దగా మార్పులు చేయడం లేదు. అలాగే ఇంజిన్ పరంగా గానీ, మెకానికల్ పార్ట్స్ పరంగా గానీ ఎలాంటి మార్పులు లేకుండా పాత ఇంజిన్‌నే కొనసాగించనున్నారు. లుక్ పరంగా మరింత స్టైలిష్‌గా మార్చడం ద్వారా యువతను ఆకట్టుకోవడమే మారుతి లక్ష్యం.

3. మైలేజ్ కింగ్.. మారుతి ఫ్రాంక్స్ ఫేస్‌లిఫ్ట్ (New Maruti Fronx Facelift)
మారుతి సుజుకి నుంచి వచ్చిన బెస్ట్ క్రాస్ఓవర్ మోడల్ ఫ్రాంక్స్ (Fronx) కూడా సరికొత్త ఫేస్‌లిఫ్ట్ రూపంలో రాబోతోంది. ఈ కారు డిజైన్‌ను మరింత ఆకర్షణీయంగా మార్చడంతో పాటు, మారుతి సంస్థ ఇందులో ఒక విప్లవాత్మకమైన మార్పును తీసుకురాబోతోంది. అదే దీని ఇంజిన్ టెక్నాలజీ. కొత్త ఫ్రాంక్స్ కార్లో కంపెనీ ఒక ప్రత్యేకమైన సిరీస్ హైబ్రిడ్ (Series Hybrid) ఇంజిన్‌ను అందించనుంది.

ఇది 1.2-లీటర్ పెట్రోల్ ఇంజిన్, ఎలక్ట్రిక్ మోటార్ కాంబినేషన్‌తో పనిచేస్తుంది. ఇందులో పెట్రోల్ ఇంజిన్ నేరుగా చక్రాలను తిప్పకుండా, కేవలం ఎలక్ట్రిక్ మోటార్‌కు పవర్ ఇచ్చే జనరేటర్‌లా మాత్రమే పనిచేస్తుంది. ఈ సరికొత్త టెక్నాలజీ వల్ల ఈ కారు లీటరుకు ఏకంగా 35 కిలోమీటర్ల మైలేజ్ ఇస్తుందని అంచనా వేస్తున్నారు.

4. మారుతి సుజుకి మొదటి ఎలక్ట్రిక్ ఎమ్‌పీవీ YMC (Maruti Suzuki YMC EV)
మారుతి సుజుకి సంస్థ తన చరిత్రలోనే మొదటిసారిగా ఒక పూర్తి స్థాయి ఎలక్ట్రిక్ ఫ్యామిలీ కార్ (MPV) పై పనిచేస్తోంది. దీనికి ప్రస్తుతానికి ‘YMC’ అనే కోడ్‌నేమ్ ఇచ్చారు. ఈ సరికొత్త 7-సీటర్ ఎలక్ట్రిక్ కారు ఇప్పటికే భారతీయ రోడ్లపై టెస్టింగ్ జరుపుకుంటూ కనిపించింది. ఈ కొత్త మోడల్‌ను కంపెనీ త్వరలో రాబోతున్న ఈ విటారా (e Vitara) ప్లాట్‌ఫామ్‌పైనే రూపొందిస్తోంది.

కాబట్టి ఈ కారులో కూడా అదే పవర్‌ఫుల్ బ్యాటరీ ప్యాక్, పవర్‌ట్రైన్ ఆప్షన్లు ఉండే అవకాశం ఉంది. ఎక్స్‌టీరియర్ పరంగా ఇదొక రఫ్ అండ్ టఫ్ ఎస్‌యూవీ లుక్‌ను కలిగి ఉన్నప్పటికీ, ఇంటీరియర్ మాత్రం చాలా లగ్జరీగా, విశాలంగా ఉంటుంది. ఈ లగ్జరీ ఎలక్ట్రిక్ ఎమ్‌పీవీ కారును 2027 ప్రారంభంలో లాంచ్ చేసే అవకాశాలు ఉన్నాయి.

5. టాటా పంచ్‌కు పోటీగా మారుతి Y43 మైక్రో ఎస్‌యూవీ (Maruti Suzuki Y43 Micro SUV)
సబ్‌-కాంపాక్ట్ లేదా మైక్రో ఎస్‌యూవీ సెగ్మెంట్లో దూసుకుపోతున్న టాటా పంచ్, హ్యుందాయ్ ఎక్స్టర్ కార్లకు గట్టి పోటీ ఇచ్చేందుకు మారుతి సుజుకి సరికొత్త ప్లాన్ వేసింది. 2027 ద్వితీయార్థంలో ఒక సరికొత్త మైక్రో ఎస్‌యూవీని లాంచ్ చేయడానికి కంపెనీ యోచిస్తోంది. ఈ ప్రాజెక్ట్‌కు ప్రస్తుతానికి Y43 అనే కోడ్‌నేమ్ ఇచ్చారు.

మధ్యతరగతి కుటుంబాలకు తక్కువ ధరలో ఎస్‌యూవీ ఫీలింగ్ ఇచ్చేలా ఈ కారును డిజైన్ చేస్తున్నారు. అయితే ఈ కారుకు సంబంధించిన ఫీచర్లు, ఇంజిన్ వివరాలు లేదా ఖచ్చితమైన డిజైన్ ఎలా ఉండబోతుందనే సమాచారాన్ని మారుతి సుజుకి సంస్థ ఇంకా అధికారికంగా వెల్లడించలేదు. కానీ తక్కువ బడ్జెట్‌లో టాప్ ఫీచర్లతో ఈ కారు రాబోతుందని సమాచారం.