పైలట్ అయ్యే సవర్ణావకాశం! దేశంలోకి 11 కొత్త ఫ్లయింగ్ స్కూళ్లు..
దేశీయ విమానయాన రంగం రాకెట్ వేగంతో దూసుకుపోతోంది. కొత్త విమానాలు, సరికొత్త విమానాశ్రయాలు రూపుదిద్దుకుంటున్న వేళ.. ఆకాశంలో విమానాలను నడిపే ‘పైలట్ల’ డిమాండ్ మునుపెన్నడూ లేని స్థాయికి చేరింది. భవిష్యత్తు అవసరాలను తట్టుకోవడానికి, విదేశీ శిక్షణపై ఆధారపడే పరిస్థితిని తగ్గించడానికి ‘ఎయిర్పోర్ట్స్ అథారిటీ ఆఫ్ ఇండియా’ (AAI) ఒక భారీ మాస్టర్ ప్లాన్కు ఆమోదముద్ర వేసింది.
రాబోయే పదేళ్లలో మనదేశ విమానయాన రంగానికి ఏకంగా 30 వేల మందికి పైగా కొత్త పైలట్లు అవసరమవుతారని అంచనా. మరో ఐదేళ్లలో దేశీయ విమానయాన సంస్థలు తమ నౌకాదళంలోకి వందలాది కొత్త విమానాలను చేర్చబోతున్నాయి. అలాగే కొత్తగా మరో 50 దాకా విమానాశ్రయాలు కూడా అందుబాటులోకి రానున్నాయి. ఈ స్థాయిలో పెరుగుతున్న డిమాండ్ను తట్టుకోవాలంటే దేశంలోనే శిక్షణ సదుపాయాలు పెంచడం తప్పనిసరిగా మారింది.
11 కొత్త శిక్షణా కేంద్రాలు సిద్ధం!
ఈ సవాలును అధిగమించేందుకు ఎయిర్పోర్ట్స్ అథారిటీ ఆఫ్ ఇండియా ఏడు ప్రధాన విమానాశ్రయాల పరిధిలో 11 కొత్త ‘ఫ్లయింగ్ ట్రైనింగ్ ఆర్గనైజేషన్’ (FTO) స్లాట్ల కేటాయింపు ప్రక్రియను విజయవంతంగా పూర్తి చేసింది. టెండర్ విధానం పూర్తి కావడంతో త్వరలోనే ఇక్కడ శిక్షణా కేంద్రాల ఏర్పాటు పనులు షురూ కానున్నాయి. ఇవి అందుబాటులోకి వస్తే మన యువత పైలట్ కోర్సుల కోసం ఇతర దేశాలకు వెళ్లాల్సిన అవసరం చాలా వరకు తగ్గుతుంది.
వేలాది మందికి పైలట్ కావాలనే కల నెరవేరేలా..
ఈ కొత్త ఫ్లయింగ్ స్కూళ్ల ప్రారంభంతో తొలినాళ్లలోనే దాదాపు 60 నుంచి 70 శిక్షణా విమానాలు, ఆధునిక సిమ్యులేటర్లు రంగంలోకి దిగనున్నాయి. ఇవి పూర్తిస్థాయిలో పనిచేయడం ప్రారంభించాక, వీటి ద్వారా ఏడాదికి 1500 మందికి పైగా ఏవియేషన్ నిపుణులు, వందలాది మంది కొత్త పైలట్లు తయారవుతారు. స్థానిక విమానాశ్రయాలను పూర్తిస్థాయిలో వాడుకోవడంతో పాటు యువతకు తక్కువ ఖర్చులోనే నాణ్యమైన పైలట్ శిక్షణ లభించే అవకాశముంది.
దేశీయంగా పెరుగుతున్న క్రేజ్!
గత కొన్నేళ్లుగా మనదేశంలో కమర్షియల్ పైలట్ లైసెన్సులు (CPL) పొందే వారి సంఖ్య గణనీయంగా పెరుగుతోంది. ఒకప్పుడు కేవలం వందల సంఖ్యలోనే ఉన్న పైలట్ లైసెన్సుల జారీ, ఇప్పుడు వేలల్లోకి చేరింది. తాజాగా రాబోతున్న ఈ 11 ఫ్లయింగ్ స్కూళ్లతో భారతీయ విమానయాన రంగానికి మరింత ఊపు రానుండడమే కాకుండా, మన దేశం గ్లోబల్ ఏవియేషన్ హబ్గా మారడానికి గట్టి పునాది పడనుంది.
