భారత ఆటోమొబైల్ మార్కెట్లో ఒకప్పుడు సంచలనం సృష్టించిన తన ఐకానిక్ మోడళ్లను టాటా మోటార్స్ ఒక్కొక్కటిగా మళ్లీ తీసుకొస్తోంది. పాత మోడళ్లకు ఉన్న క్రేజ్‌ను ఆధునిక టెక్నాలజీ, కొత్త డిజైన్‌తో కలిపి మరోసారి వినియోగదారుల ముందుకు తీసుకురావడంపై కంపెనీ దృష్టి సారించింది. ఇప్పటికే ఈ వ్యూహం టాటా మోటార్స్‌కు మంచి ఫలితాలను కూడా ఇస్తోంది. దీనికి టాటా సఫారీనే పెద్ద ఉదాహరణ. తొలిసారిగా 1998లో మార్కెట్లోకి వచ్చిన ఈ SUV దాదాపు రెండు దశాబ్దాల పాటు భారతీయుల అభిమానాన్ని సొంతం చేసుకుంది. అయితే BS6 ఉద్గార నిబంధనలు అమల్లోకి రావడంతో 2019లో ఈ మోడల్‌ను నిలిపివేయాల్సి వచ్చింది. అనంతరం 2021లో పూర్తిగా కొత్త అవతారంలో సఫారీని మళ్లీ మార్కెట్లోకి తీసుకొచ్చిన టాటా మోటార్స్, మరోసారి ఈ మోడల్‌ను విజయవంతంగా నిలబెట్టింది.

అదే విధంగా ఒకప్పుడు యువతకు ఎంతో ఇష్టమైన టాటా సియెర్రా కూడా మళ్లీ రీఎంట్రీ ఇచ్చింది. సుమారు 22 ఏళ్ల విరామం తర్వాత కంపెనీ 2025లో సరికొత్త డిజైన్, అత్యాధునిక ఫీచర్లతో సియెర్రాను తిరిగి భారత మార్కెట్లో ప్రవేశపెట్టింది. దీంతో పాత మోడళ్లను ఆధునిక రూపంలో తీసుకురావాలన్న టాటా వ్యూహం స్పష్టంగా కనిపిస్తోంది. ఇప్పుడు ఇదే జాబితాలో మరో లెజెండరీ పేరు చేరబోతుందనే వార్తలు వినిపిస్తున్నాయి.

అదే టాటా సుమో(Tata Sumo). 1994లో తొలిసారిగా మార్కెట్లోకి వచ్చిన ఇది గ్రామీణ ప్రాంతాల నుంచి పట్టణాల వరకు విపరీతమైన ఆదరణ పొందింది. బలమైన నిర్మాణం, ఎక్కువ మంది ప్రయాణించే సామర్థ్యం, అన్ని రకాల రోడ్లపై సులభంగా నడిచే సామర్థ్యం కారణంగా టాటా సుమో చాలా కాలం పాటు వినియోగదారుల తొలి ఎంపికగా నిలిచింది. దాదాపు 25 సంవత్సరాల పాటు అమ్మకాల్లో కొనసాగిన టాటా సుమోను 2019లో కంపెనీ నిలిపివేసింది.

దీంతో టాటా మోటార్స్ చరిత్రలో అత్యధిక కాలం విక్రయించబడిన మోడళ్లలో ఒకటిగా ఇది గుర్తింపు పొందింది. తాజాగా వస్తున్న సమాచారం ప్రకారం, ఈ ఐకానిక్ SUVని సరికొత్త డిజైన్, ఆధునిక ఫీచర్లు, తాజా టెక్నాలజీతో మళ్లీ భారత మార్కెట్లోకి తీసుకురావడానికి టాటా మోటార్స్ సన్నాహాలు చేస్తున్నట్లు తెలుస్తోంది. అధికారిక ప్రకటన ఇంకా వెలువడనప్పటికీ, టాటా అభిమానుల్లో మాత్రం ఈ వార్త ఆసక్తిని పెంచుతోంది.

ప్రస్తుతం వినిపిస్తున్న సమాచారం ప్రకారం, కొత్త తరం టాటా సుమోను 2027లో నిర్వహించనున్న ఆటో ఎక్స్‌పోలో టాటా మోటార్స్ తొలిసారిగా ప్రదర్శించే అవకాశం ఉంది. కాన్సెప్ట్ లేదా ప్రీ-ప్రొడక్షన్ రూపంలో ఆవిష్కరించి, సందర్శకులు, ఆటో నిపుణుల నుంచి వచ్చే స్పందనను కంపెనీ పరిశీలించే అవకాశం ఉందని ప్రచారం జరుగుతోంది. ఆ స్పందన సానుకూలంగా ఉంటే, అనంతరం ఉత్పత్తి దశకు తీసుకెళ్లి భారత మార్కెట్లో విక్రయించే అవకాశాలు ఉన్నాయని భావిస్తున్నారు.

డిజైన్ పరంగా చూస్తే, కొత్త సుమో తన పాత గుర్తింపును కొనసాగిస్తూనే ఆధునిక SUVల తరహాలో పూర్తిగా కొత్త రూపంలో వచ్చే అవకాశం ఉంది. ఆకర్షణీయమైన ఫ్రంట్ ఫాసియా, LED హెడ్‌లైట్లు, LED డేటైమ్ రన్నింగ్ లైట్లు(DRLs), LED టెయిల్ ల్యాంప్స్, స్టైలిష్ అల్లాయ్ వీల్స్ వంటి ప్రీమియం ఎలిమెంట్స్ ఇందులో ఉండొచ్చని అంచనా. అలాగే వినియోగదారుల అభిరుచికి అనుగుణంగా పలు ఆకర్షణీయమైన కలర్ ఆప్షన్లలో అందుబాటులోకి వచ్చే అవకాశముంది.

సీటింగ్ పరంగా 7-సీటర్ లేదా 9-సీటర్‌లో తీసుకురావచ్చని సమాచారం. ఎక్కువ మంది కలిసి సుదూర ప్రయాణాలు చేసే వారికి కొత్త సుమో మంచి ఎంపికగా మారే అవకాశం ఉంది. అయితే ప్రస్తుతం ఇవన్నీ అంచనాలు, ప్రచారంలో ఉన్న వివరాలే. టాటా మోటార్స్ నుంచి అధికారిక ప్రకటన వెలువడిన తర్వాతే కొత్త సుమోలో ఉపయోగించే ఇంజిన్, పవర్‌ట్రెయిన్, ఫీచర్లు, సేఫ్టీ పరికరాలు, ధర, లాంచ్ టైమ్‌లైన్ వంటి పూర్తి వివరాలు వెల్లడవుతాయి.