భారతదేశంలో ఎలక్ట్రిక్ స్కూటర్ల మార్కెట్ రోజురోజుకూ వేగంగా విస్తరిస్తోంది. ఇప్పటికే ఈ విభాగంలో పలు కంపెనీలు తమ ఆధిపత్యాన్ని చాటుకుంటుండగా, హోండా కూడా తన స్థానాన్ని మరింత బలపరచుకోవడానికి కొత్త వ్యూహాలతో ముందుకు సాగుతోంది. ఇప్పటికే యాక్టివా e, QC1 వంటి ఎలక్ట్రిక్ స్కూటర్లను భారత మార్కెట్లో ప్రవేశపెట్టిన హోండా, ఇప్పుడు మరో కొత్త మోడల్‌ను తీసుకురావడానికి సిద్ధమవుతోందనే సంకేతాలు కనిపిస్తున్నాయి. ఆ స్కూటర్ మరేదో కాదు.. హోండా యూ-గో (U-Go). ఈ ఎలక్ట్రిక్ స్కూటర్ ప్రస్తుతం చైనా, మయన్మార్ వంటి అంతర్జాతీయ మార్కెట్లలో విక్రయించబడుతోంది.

ఆసక్తికరమైన విషయం ఏమిటంటే, హోండా ఈ స్కూటర్‌కు సంబంధించిన డిజైన్ పేటెంట్‌ను భారతదేశంలో 2022లోనే దాఖలు చేసింది. అప్పటి నుంచి ఈ మోడల్ భారత మార్కెట్లోకి వచ్చే అవకాశాలపై చర్చ జరుగుతూనే ఉంది. సాధారణంగా కంపెనీలు భవిష్యత్ ఉత్పత్తుల కోసం మాత్రమే ఇలాంటి పేటెంట్లను నమోదు చేస్తుంటాయి. అందుకే యూ-గోను కూడా భారత మార్కెట్లో విడుదల చేసే అవకాశాలు బలంగా కనిపిస్తున్నాయని ఆటోమొబైల్ వర్గాలు భావిస్తున్నాయి.

ఇటీవల హోండా అనుసరిస్తున్న వ్యూహాన్ని గమనిస్తే ఈ అంచనాకు మరింత బలం చేకూరుతోంది. యూరప్‌లో CUV e పేరుతో విక్రయిస్తున్న ఎలక్ట్రిక్ స్కూటర్‌ను భారతదేశంలో యాక్టివా e, QC1 పేర్లతో అందుబాటులోకి తీసుకొచ్చింది. ఇదే విధంగా కొన్ని సంవత్సరాల క్రితం యూరప్‌లో EM1 e పేరుతో విడుదలైన మోడల్, చైనా మార్కెట్లో U-Goగా విక్రయించబడుతోంది. దీంతో ఇదే స్కూటర్‌ను భారత మార్కెట్‌కు కూడా తీసుకువచ్చే అవకాశాలు ఎక్కువగా ఉన్నాయని భావిస్తున్నారు.

ధర విషయానికి వస్తే, చైనాలో హోండా యూ-గో ఎలక్ట్రిక్ స్కూటర్ భారత కరెన్సీలో సుమారు రూ.1.21 లక్షల ధరకు విక్రయించబడుతోంది. భారతదేశంలో విడుదలైతే, ధరలో కొంత మార్పు ఉండే అవకాశం ఉన్నప్పటికీ, ప్రీమియం ఎలక్ట్రిక్ స్కూటర్ సెగ్మెంట్‌లో ఓలా, టీవీఎస్, బజాజ్, ఏథర్ వంటి బ్రాండ్లకు ఇది గట్టి పోటీ ఇచ్చే అవకాశాలు కనిపిస్తున్నాయి. హోండా యూ-గో ప్రధానంగా 50cc పెట్రోల్ స్కూటర్లకు ప్రత్యామ్నాయంగా రూపొందించిన ఎంట్రీ-లెవల్ ఎలక్ట్రిక్ స్కూటర్.

ఇందులో 1.2 kW గరిష్ట శక్తిని ఉత్పత్తి చేసే ఎలక్ట్రిక్ మోటార్ ఉండగా, గరిష్ట వేగం గంటకు 53 కిలోమీటర్ల వరకు ఉంటుంది. స్కూటర్‌లో ప్రామాణికంగా 1.44 kWh బ్యాటరీ ప్యాక్‌ను అందిస్తున్నారు. ఈ బ్యాటరీతో ఒక్కసారి పూర్తి ఛార్జ్ చేస్తే సుమారు 65 కిలోమీటర్ల వరకు ప్రయాణించవచ్చు. ఎక్కువ రేంజ్ అవసరమయ్యే వారికి అదనంగా మరో బ్యాటరీ ప్యాక్‌ను అమర్చుకునే అవకాశం కూడా ఉంది.

రెండు బ్యాటరీలతో కలిపి గరిష్టంగా 130 కిలోమీటర్ల వరకు రేంజ్ లభిస్తుంది. ప్రపంచవ్యాప్తంగా హోండా ఈ స్కూటర్‌ను ప్రధానంగా నగర వినియోగాన్ని దృష్టిలో పెట్టుకుని విక్రయిస్తోంది. రోజువారీ చిన్న ప్రయాణాలు చేసే ఉద్యోగులు, కళాశాల విద్యార్థులు, గృహిణులు వంటి వారికి ఇది మంచి ఎంపికగా నిలిచే అవకాశం ఉంది. తక్కువ వేగం, సులభమైన రైడింగ్, కాంపాక్ట్ డిజైన్ ఈ స్కూటర్ ప్రత్యేకతలు.

అయితే, ప్రస్తుతం భారతదేశంలో ఈ స్కూటర్ డిజైన్‌కు మాత్రమే పేటెంట్ నమోదైంది. పేటెంట్ దాఖలు చేసినంత మాత్రాన ఈ మోడల్‌ను తప్పకుండా భారత మార్కెట్లో విడుదల చేస్తారని చెప్పలేం. అయినప్పటికీ, హోండా గతంలో అనుసరించిన వ్యూహాన్ని పరిశీలిస్తే, భవిష్యత్తులో యూ-గో భారత మార్కెట్లో అడుగుపెట్టే అవకాశాలను పూర్తిగా కొట్టిపారేయలేం. ఇందుకు సంబంధించి కంపెనీ నుంచి అధికారిక ప్రకటన వెలువడే వరకు వేచి చూడాల్సిందే.