భారతదేశ ఆటోమొబైల్ మార్కెట్లో ఎస్‌యూవీ (SUV) కార్లకు ఉన్న క్రేజ్ అంతా ఇంతా కాదు. ప్రస్తుతం కారు కొనాలనుకునే మెజారిటీ కస్టమర్లు ఎస్‌యూవీ మోడళ్ల వైపే మొగ్గు చూపుతున్నారు. మీరు కూడా తక్కువ బడ్జెట్‌లో అదిరిపోయే లుక్, పవర్‌ఫుల్ ఇంజన్, లేటెస్ట్ ఫీచర్లు ఉన్న బెస్ట్ ఎస్‌యూవీ కోసం చూస్తుంటే కొద్దిరోజులు ఓపిక పట్టడం మంచిది. ఎందుకంటే రాబోయే రోజుల్లో దేశీయ మార్కెట్లోకి టాటా మోటర్స్, మారుతి సుజుకి, కియా, హోండా కంపెనీల నుంచి సరికొత్త ఎస్‌యూవీలు విడుదల కానున్నాయి. ఈ కార్ల ప్రత్యేకత ఏంటంటే వీటి ప్రారంభ ధర కేవలం రూ.10 లక్షల లోపే ఉండే అవకాశం ఉంది.

సరికొత్త ప్లాట్‌ఫామ్‌తో రాబోతున్న నెక్స్ట్ జనరేషన్ టాటా నెక్సాన్
భారతదేశంలో అత్యధికంగా అమ్ముడవుతున్న కార్లలో ఒకటైన టాటా నెక్సాన్, సరికొత్త అప్‌డేట్‌తో రానుంది. టాటా మోటర్స్ సంస్థ 2027 ప్రారంభంలో న్యూ జనరేషన్ నెక్సాన్ (Next-Gen Tata Nexon)ను లాంచ్ చేసేందుకు ప్లాన్ చేస్తోంది. దీని ధర మార్కెట్లో రూ.8 లక్షల నుంచి రూ.17 లక్షల మధ్య ఉండవచ్చని అంచనా. ప్రస్తుతం ఉన్న X1 ప్లాట్‌ఫామ్‌కు బదులుగా ఈ కొత్త కారును ARGOS ప్లాట్‌ఫామ్‌పై తయారు చేయనున్నారు.

దీనివల్ల కారు లోపల కేబిన్ స్పేస్ మరింత పెరుగుతుంది. ఇందులో ప్రస్తుతమున్న 1.2 లీటర్ టర్బో పెట్రోల్, 1.5 లీటర్ డీజిల్ ఇంజన్ ఆప్షన్లు కొనసాగుతాయి. ఈ కొత్త ప్లాట్‌ఫామ్ హైబ్రిడ్ టెక్నాలజీకి కూడా సపోర్ట్ చేస్తుంది కాబట్టి, భవిష్యత్తులో నెక్సాన్ హైబ్రిడ్ (Nexon HEV) మోడల్ కూడా వచ్చే అవకాశం ఉంది.

మధ్యతరగతి కోసం హోండా కొత్త కాంపాక్ట్ ఎస్‌యూవీ
ప్రముఖ కార్ల తయారీ సంస్థ హోండా సైతం మధ్యతరగతి కస్టమర్లను టార్గెట్ చేస్తూ ఒక కొత్త కాంపాక్ట్ ఎస్‌యూవీని సిద్ధం చేస్తోంది. దీనిని 2027 మధ్య నాటికి ఇండియన్ మార్కెట్లో లాంచ్ చేయవచ్చని తెలుస్తోంది. ముంబైలో దీని సంభావ్య ఆన్-రోడ్ ధర రూ.8 లక్షల నుంచి రూ.16 లక్షల వరకు ఉండే అవకాశం ఉంది.

ఈ కారులో హోండా అమేజ్ సెడాన్‌లో ఇచ్చే 1.2 లీటర్ నేచురల్లీ ఆస్పిరేటెడ్ పెట్రోల్ ఇంజన్‌ను ఉపయోగించనున్నారు. అలాగే అంతర్జాతీయ మార్కెట్లో ఉన్న 1.0 లీటర్ టర్బో-పెట్రోల్ ఇంజన్ వెర్షన్‌ను కూడా భారత్‌లోకి తెచ్చే ఛాన్స్ ఉంది. ఫీచర్ల పరంగా ఇందులో అడ్వాన్స్‌డ్ డ్రైవర్ అసిస్టెన్స్ సిస్టమ్ (ADAS), వెంటిలేటెడ్ ఫ్రంట్ సీట్లు, ఎలక్ట్రిక్ సన్‌రూఫ్ వంటి మోడ్రన్ ఫీచర్లు ఉండనున్నాయి.

పెట్రోల్ టెన్షన్ దూరం చేసే మారుతి ఫ్రాంక్స్ ఫ్లెక్స్ ఫ్యూయల్
మారుతి సుజుకి సంస్థ పర్యావరణహితమైన మరియు తక్కువ ఖర్చుతో నడిచే సరికొత్త ఫ్రాంక్స్ ఫ్లెక్స్ ఫ్యూయల్ (Fronx Flex Fuel) కారును 2026 చివరి నాటికి మార్కెట్లోకి తీసుకురావడానికి కసరత్తు చేస్తోంది. దీని ఆన్-రోడ్ ధర సుమారు రూ.9 లక్షల నుంచి రూ.15 లక్షల మధ్య ఉండవచ్చు.

ఈ కారు ప్రత్యేకత ఏంటంటే, ఇది 100 శాతం ఇథనాల్ (E100) ఇంధనంతో నడుస్తుంది. దీనికోసం కారులోని 1.2 లీటర్ నేచురల్లీ ఆస్పిరేటెడ్ పెట్రోల్ ఇంజన్‌ను ఫ్లెక్స్-ఫ్యూయల్ టెక్నాలజీకి అనుగుణంగా అప్‌డేట్ చేశారు. దీని బాహ్య డిజైన్‌లో పెద్దగా మార్పులు ఉండవు కానీ, కారుపై ప్రత్యేకమైన ఫ్లెక్స్ ఫ్యూయల్ బ్యాడ్జింగ్ కనిపించనుంది. పెట్రోల్ ధరలతో ఇబ్బంది పడేవారికి ఇదొక బెస్ట్ ఆప్షన్ కానుంది.

ప్రీమియం ఫీచర్లు, కొత్త లుక్‌తో న్యూ జనరేషన్ కియా సోనెట్
కియా ఇండియా తన పాపులర్ మోడల్ సోనెట్‌ను సరికొత్త హంగులతో న్యూ జనరేషన్ కియా సోనెట్ (Next-Gen Kia Sonet)గా 2027 ఆరంభంలో విడుదల చేయనుంది. దీని ఆన్-రోడ్ ధర సుమారు రూ. 9 లక్షల నుంచి రూ. 18 లక్షల వరకు ఉండవచ్చని సమాచారం. ఈ కారు కియాకు చెందిన అధునాతన K1 ప్లాట్‌ఫామ్ పై బేస్ అయి ఉంటుంది. దీనివల్ల కారు సేఫ్టీ మరియు కేబిన్ స్పేస్ రెండూ అద్భుతంగా మెరుగవుతాయి.

ఈ కొత్త సోనెట్‌లో లగ్జరీ కార్లలో ఉండేలా 12.3 ఇంచుల భారీ టచ్‌స్క్రీన్ ఇన్ఫోటైన్‌మెంట్, 12.3 ఇంచుల డిజిటల్ ఇన్‌స్ట్రుమెంట్ క్లస్టర్, లెవెల్-2 అడాస్ (ADAS Level 2), అద్భుతమైన పనోరమిక్ సన్‌రూఫ్ వంటి ప్రీమియం ఫీచర్లను అందించనున్నారు. ఇంజన్ ఆప్షన్ల విషయానికి వస్తే 1.0 లీటర్ టర్బో-పెట్రోల్, 1.2 లీటర్ పెట్రోల్, 1.5 లీటర్ డీజిల్ ఇంజన్లు యథాతథంగా అందుబాటులో ఉంటాయి. భవిష్యత్తులో సోనెట్ హైబ్రిడ్ వెర్షన్‌ను కూడా లాంచ్ చేయాలని కియా యోచిస్తోంది.