రెబల్ స్టార్ ప్రభాస్ వరుస పాన్ ఇండియా ప్రాజెక్టులతో గ్లోబల్ బాక్సాఫీస్ వద్ద సరికొత్త రికార్డులను సృష్టిస్తున్నారు. ప్రస్తుతం తన లైనప్‌లో మోస్ట్ యాంటిసిపేటెడ్ చిత్రంగా నిలిచిన ‘ఫౌజీ’ షూటింగ్‌లో బిజీగా ఉన్నారు. ‘సీతా రామం’ వంటి క్లాసిక్ లవ్ స్టోరీని అందించిన టాలెంటెడ్ డైరెక్టర్ హను రాఘవపూడి దర్శకత్వంలో ఈ చారిత్రక యుద్ధ నేపథ్య చిత్రం రూపొందుతోంది. మైత్రీ మూవీ మేకర్స్ అత్యంత ప్రతిష్టాత్మకంగా నిర్మిస్తున్న ఈ పీరియాడిక్ యాక్షన్ డ్రామా షూటింగ్ ప్రస్తుతం జెట్ స్పీడ్‌లో కొనసాగుతోంది. అయితే ఈ సినిమాకు సంబంధించిన బడ్జెట్, విజువల్స్ గురించిన ఒక సంచలన వార్త ఇప్పుడు టాలీవుడ్ ఇండస్ట్రీ వర్గాల్లో హాట్ టాపిక్‌గా మారింది.

విశ్వసనీయ సమాచారం ప్రకారం, ఈ చిత్రాన్ని మైత్రీ మూవీ మేకర్స్ సంస్థ దాదాపు రూ. 500 కోట్ల నుండి రూ. 600 కోట్ల భారీ బడ్జెట్‌తో నిర్మిస్తోంది. స్వాతంత్ర్యానికి పూర్వపు రోజులను, ముఖ్యంగా 1940ల కాలం నాటి పరిస్థితులను కళ్లకు కట్టేలా చూపించేందుకు ఇండస్ట్రీలోనే మునుపెన్నడూ లేని విధంగా భారీ సెట్స్ వేస్తున్నారు. వింటేజ్ వాతావరణాన్ని ప్రతిబింబించేలా అద్భుతమైన లొకేషన్లను రీ-క్రియేట్ చేశారు. ఈ సినిమా కోసం ఇంటర్నేషనల్ స్టాండర్డ్స్ విజువల్ ఎఫెక్ట్స్ (VFX) వాడుతున్నట్లు తెలుస్తోంది. ఈ చిత్రం అందించబోయే విజువల్ ట్రీట్.. ఇండియన్ సినిమాలో ఇప్పటివరకు వచ్చిన బిగ్గెస్ట్ హిస్టారికల్, పీరియడ్ డ్రామాల గ్రాండియర్‌ను తలదన్నేలా ఉండబోతుందని సమాచారం. ప్రభాస్ రెమ్యూనరేషన్‌తో కలుపుకుంటే ఈ వ్యయం మరింత పెరిగే అవకాశం ఉందని, టాలీవుడ్ హిస్టరీలోనే ఇది వన్ ఆఫ్ ది మోస్ట్ ఎక్స్‌పెన్సివ్ ప్రాజెక్ట్ కాబోతోందని ఇండస్ట్రీ వర్గాలు అంచనా వేస్తున్నాయి.

కేవలం భారీ యాక్షన్ ఎపిసోడ్స్ మాత్రమే కాకుండా, హను రాఘవపూడి మార్క్ ఎమోషన్, గుండెలను పిండేసే అద్భుతమైన ప్రేమకథ కూడా ఈ చిత్రంలో ప్రధాన హైలైట్‌గా నిలవనున్నాయి. ఈ సినిమాలో ప్రభాస్‌కు జోడీగా సోషల్ మీడియా సెన్సేషన్ ఇమాన్వీ నటిస్తోంది. వీరిద్దరి కెమిస్ట్రీ వెండితెరపై ఒక మ్యాజిక్ క్రియేట్ చేయబోతోందని మేకర్స్ నమ్ముతున్నారు. స్వాతంత్ర్య పోరాట నేపథ్యంతో కూడిన మిలిటరీ డ్రామా కావడంతో ప్రభాస్ లుక్, క్యారెక్టరైజేషన్ ఇండియన్ సినిమా హిస్టరీలోనే ఒక కొత్త బెంచ్‌మార్క్ సెట్ చేయబోతోందని టాక్ వినిపిస్తోంది. ఈ సినిమా ఓటీటీ, థియేట్రికల్ రైట్స్ కోసం అప్పుడే బడా సంస్థలు పోటీ పడుతున్నట్లు సమాచారం. ఈ విజువల్ వండర్ బాక్సాఫీస్ వద్ద ఎలాంటి ప్రభంజనం సృష్టించబోతుందో, ప్రభాస్ కటౌట్‌కు ఈ భారీ బడ్జెట్ ఎలాంటి రికార్డులను తెచ్చిపెడుతుందో చూడాలని అభిమానులు ఎంతగానో ఎదురుచూస్తున్నారు.

Fauzi Budget, Prabhas, Hanu Raghavapudi, Mythri Movie Makers