అక్కినేని అభిమానులు ఎప్పుడెప్పుడా అని ఎదురుచూస్తున్న ఆ క్షణం రానే వచ్చింది. యువ హీరో అఖిల్ అక్కినేని కెరీర్‌లో మైల్‌స్టోన్‌గా నిలిచే భారీ విజయం దక్కింది. అఖిల్ హీరోగా నటించిన సరికొత్త చిత్రం ‘లెనిన్’ శుక్రవారం థియేటర్లలోకి వచ్చింది. మొదటి షో నుంచే ఈ సినిమాకు ప్రేక్షకులు, అభిమానుల నుంచి అద్భుతమైన రెస్పాన్స్ వస్తోంది. ముఖ్యంగా ఈ చిత్రంలో అఖిల్ అక్కినేని నటన చూసి సినీ విమర్శకులు సైతం ప్రశంసల వర్షం కురిపిస్తున్నారు. ఎన్నో ఏళ్లుగా తన కొడుకు అఖిల్ సరైన కమర్షియల్ సక్సెస్ అందుకోవాలని ఆరాటపడిన కింగ్ నాగార్జున కల ఎట్టకేలకు ఈ సినిమాతో నెరవేరింది.

ఈ ఘన విజయం అక్కినేని కుటుంబంలో సరికొత్త కాంతులు నింపింది. సినిమాకు వస్తున్న భారీ కలెక్షన్లు, పాజిటివ్ టాక్‌తో అన్నపూర్ణ స్టూడియోస్‌లో పండగ వాతావరణం నెలకొంది. శుక్రవారం సాయంత్రం నాగార్జున స్వయంగా ‘లెనిన్’ చిత్రబృందానికి అన్నపూర్ణ స్టూడియోస్‌లో గ్రాండ్ సక్సెస్ సెలబ్రేషన్స్ ఏర్పాటు చేశారు. ఈ వేడుకలో నాగార్జున, అఖిల్, చిత్ర దర్శకుడు, నిర్మాతలు, సాంకేతిక నిపుణులు పాల్గొన్నారు. అంతా కలిసి భారీ కేక్‌ను కట్ చేసి ఒకరికొకరు తినిపించుకుంటూ తమ సంతోషాన్ని పంచుకున్నారు. టాలీవుడ్‌లో ఎన్నో బ్లాక్‌బస్టర్స్ చూసిన నాగార్జున ముఖంలో ఈ విజయానందం మాత్రం చాలా ప్రత్యేకం అనిపించింది.

ఈ సెలబ్రేషన్స్ మధ్య ఒక అత్యంత భావోద్వేగభరితమైన సన్నివేశం చోటుచేసుకుంది. ఎన్నాళ్లగానో ఎదురుచూస్తున్న హిట్ రావడంతో అఖిల్ ఒక్కసారిగా ఎమోషనల్ అయ్యారు. అఖిల్ తన తండ్రి నాగార్జున పాదాలకు నమస్కరించి ఆశీర్వాదం తీసుకున్నారు. ఆ వెంటనే నాగార్జునను గట్టిగా హత్తుకుని ఒక్కసారిగా కన్నీళ్లు పెట్టుకున్నారు. కొడుకు పడ్డ కష్టం, అతని కళ్లలోని ఆనంద బాష్పాలు చూసి నాగార్జున కూడా భావోద్వేగానికి లోనయ్యారు. అఖిల్‌ను ఓదారుస్తూ నాగార్జున కళ్లలో కూడా నీళ్లు తిరిగాయి. అన్నపూర్ణ స్టూడియోస్‌లో జరిగిన ఈ ఎమోషనల్ మూమెంట్‌ని చూసి అక్కడ ఉన్న చిత్రబృందం సైతం ఒకింత కళ్లు చెమర్చారు. తండ్రీకొడుకుల ఎమోషనల్ బాండింగ్ ఫోటోలు, వీడియోలు ప్రస్తుతం నెట్టింట వైరల్‌గా మారాయి.

Lenin Movie, Akhil Akkineni, Nagarjuna, Emotional, TeluguOne