భారతీయ ఆటోమొబైల్ మార్కెట్లో కియా ఇండియా (Kia India) తనకంటూ ప్రత్యేక గుర్తింపును సంపాదించుకుంది. అత్యాధునిక ఫీచర్లు, ఆకర్షణీయమైన డిజైన్, ప్రీమియం ఇంటీరియర్, వినియోగదారుల అవసరాలకు అనుగుణంగా ఎప్పటికప్పుడు మోడళ్లను అప్‌డేట్ చేస్తూ ఈ బ్రాండ్ దేశీయ ప్రజల నమ్మకాన్ని గెలుచుకుంది. ప్రస్తుతం అమ్మకాల పరంగా భారతదేశంలో ఆరవ అతిపెద్ద కార్ల తయారీ సంస్థగా కొనసాగుతూ తన స్థానాన్ని మరింత బలోపేతం చేసుకుంటోంది. ఈ సక్సెస్‌కు ప్రధాన కారణాల్లో కియా సెల్టోస్ (Kia Seltios) ఒకటి. మిడ్-సైజ్ ఎస్‌యూవీ విభాగంలో విడుదలైన ఈ మోడల్, ప్రారంభం నుంచే వినియోగదారుల నుంచి విశేష ఆదరణ పొందింది.

మార్కెట్ అవసరాలకు అనుగుణంగా కంపెనీ వరుసగా అప్‌డేట్లు చేస్తూ, పదేళ్లు పూర్తికాకముందే సెల్టోస్‌కు మూడు తరాలను పరిచయం చేసింది. ప్రతి కొత్త వెర్షన్‌లో డిజైన్, టెక్నాలజీ, భద్రత, సౌకర్యాల పరంగా కొత్తదనం తీసుకురావడం వల్ల ఈ ఎస్‌యూవీపై క్రేజ్ మరింత పెరిగింది. తాజాగా విడుదలైన జూన్ 2026 అమ్మకాలు కూడా సెల్టోస్‌కు ఉన్న ఆదరణను మరోసారి స్పష్టం చేస్తున్నాయి. ఆ నెలలో కియా మొత్తం 9,654 సెల్టోస్ యూనిట్లను విక్రయించింది.

గత ఏడాది ఇదే నెలలో అమ్ముడైన 5,225 యూనిట్లతో పోలిస్తే, ఈసారి అమ్మకాలు ఏకంగా 85 శాతం వార్షిక వృద్ధి నమోదు చేశాయి. మిడ్-సైజ్ ఎస్‌యూవీ విభాగంలో పోటీ తీవ్రంగా ఉన్నప్పటికీ, సెల్టోస్ ఇంత భారీ వృద్ధిని నమోదు చేయడం మార్కెట్లో దీనికి ఉన్న బలమైన డిమాండ్‌కు నిదర్శనం. రాబోయే నెలల్లో కూడా ఇదే జోరు కొనసాగితే, కియా అమ్మకాల వృద్ధిలో సెల్టోస్ కీలక పాత్ర పోషించే అవకాశాలు కనిపిస్తున్నాయి.

డిజైన్ పరంగా కొత్త తరం కియా సెల్టోస్ మరింత ప్రీమియం లుక్‌తో ఆకట్టుకుంటోంది. ముందుభాగంలో టెల్యురైడ్‌ను తలపించే భారీ ఫ్రంట్ గ్రిల్, నిలువుగా అమర్చిన షార్ప్ LED డేటైమ్ రన్నింగ్ లైట్లు (DRLs), బ్లాక్ బాడీ క్లాడింగ్, ఫ్లష్ డోర్ హ్యాండిల్స్, బ్లాక్-అవుట్ పిల్లర్స్, వెనుక భాగాన్ని పూర్తి వెడల్పున కలుపుతూ ఉన్న LED లైట్ బార్ ఈ SUVకి ఆధునిక, స్పోర్టీ రూపాన్ని తీసుకొచ్చాయి.

భద్రత విషయంలో ఎలాంటి రాజీ పడలేదు. ఈ ఏడాది నిర్వహించిన క్రాష్ సేఫ్టీ పరీక్షల్లో కొత్త తరం సెల్టోస్ 5-స్టార్ సేఫ్టీ రేటింగ్ సాధించి తన భద్రతా ప్రమాణాలను నిరూపించుకుంది. పెద్దల భద్రత విభాగంలో 32 పాయింట్లకు గాను 31.70 పాయింట్లు, పిల్లల భద్రతలో 49 పాయింట్లకు గాను 45 పాయింట్లు సాధించడం విశేషం. ఈ మెరుగైన ఫలితాలకు SUVలో అందించిన అధునాతన భద్రతా ఫీచర్లు ప్రధాన కారణంగా చెప్పవచ్చు.

ఇందులో 6 ఎయిర్‌బ్యాగ్‌లు, ఎలక్ట్రానిక్ స్టెబిలిటీ కంట్రోల్, ముందు-వెనుక డిస్క్ బ్రేక్‌లు, హిల్ హోల్డ్ అసిస్ట్, టైర్ ప్రెజర్ మానిటరింగ్ సిస్టమ్, ISOFIX చైల్డ్ సీట్ యాంకరేజ్‌లు, రివర్స్ పార్కింగ్ కెమెరా వంటివి స్టాండర్డ్ లేదా వేరియంట్‌ను బట్టి అందుబాటులో ఉన్నాయి. ధరల విషయానికి వస్తే, కొత్త తరం సెల్టోస్ రూ.10.99 లక్షల ప్రారంభ ఎక్స్-షోరూమ్ ధరతో అందుబాటులో ఉండగా, టాప్-ఎండ్ వేరియంట్ ధర రూ.22.02 లక్షల వరకు చేరుతుంది.

ఈ SUVని మూడు ఇంజిన్లతో అందిస్తోంది. వీటిలో 1.5 లీటర్ నేచురల్లీ ఆస్పిరేటెడ్ పెట్రోల్, 1.5 లీటర్ టర్బో పెట్రోల్, 1.5 లీటర్ డీజిల్ ఇంజిన్లు ఉన్నాయి. అలాగే ట్రాన్స్‌మిషన్ పరంగా 6-స్పీడ్ మాన్యువల్, CVT ఆటోమేటిక్, iMT, 7-స్పీడ్ DCT ఆటోమేటిక్ వంటి పలు ఆప్షన్లు ఉండటంతో, పనితీరు, డ్రైవింగ్ అనుభవం విషయంలో కొనుగోలుదారులకు వేరు వేరు ఎంపికలు లభిస్తున్నాయి.