సూపర్ స్టార్ మహేష్ బాబు వ్యక్తిగత జీవితానికి సంబంధించి సోషల్ మీడియాలో ఎప్పుడూ ఆసక్తికరమైన చర్చలు జరుగుతుంటాయి. అయితే, తాజాగా ఆయన వదిన, ప్రముఖ బాలీవుడ్ నటి శిల్పా శిరోద్కర్ మహేష్ బాబుకు సంబంధించిన ఒక సరదా విషయాన్ని బయటపెట్టి, అందరినీ ఆశ్చర్యపరిచారు. ఇటీవల ‘ఇండియాస్ బెస్ట్ డ్యాన్సర్’ సీజన్ 5 రియాలిటీ షోలో పాల్గొన్న శిల్పా శిరోద్కర్, తన మరిది మహేష్ బాబుతో ఉన్న ఒక ఫన్నీ సీక్రెట్‌ను పంచుకున్నారు. ఈ విషయం ప్రస్తుతం ఇంటర్నెట్‌లో వైరల్ అవుతోంది.

నమ్రత శిరోద్కర్, మహేష్ బాబు వివాహం జరిగిన కొత్త రోజులను శిల్పా శిరోద్కర్ గుర్తుచేసుకున్నారు. అప్పట్లో మహేష్ బాబుకు మరాఠీ భాష అస్సలు తెలియదని, ఆయన కేవలం తెలుగులో మాత్రమే మాట్లాడేవారని శిల్పా వివరించారు. ఇదే విషయాన్ని నమ్మి.. నమ్రత, శిల్పా శిరోద్కర్ తమ మధ్య ఏవైనా రహస్య విషయాలు మాట్లాడుకోవాల్సి వస్తే, నిర్భయంగా మరాఠీ భాషను ఉపయోగించేవారట. తమకు మరాఠీ వచ్చు కదా, మహేష్ బాబుకు అర్థం కాదులే అని వారు భావించేవారు. కానీ, ఇక్కడే మహేష్ ఇద్దరికీ ఒక పెద్ద షాక్ ఇచ్చారు.

పెళ్లయిన కొన్ని సంవత్సరాల తర్వాత ఒకానొక సందర్భంలో శిల్పా, నమ్రత ఏదో విషయం గురించి మరాఠీలో మాట్లాడుకుంటున్నారు. ఆ సమయంలో అకస్మాత్తుగా మహేష్ జోక్యం చేసుకుని, “అచ్చా, అలాగా?” (Accha, asa kaay?) అని మరాఠీలో స్పందించారు. ఇది వినగానే శిల్పా, నమ్రతలు ఒక్కసారిగా షాక్ అయ్యారు. మహేష్ కు మరాఠీ వచ్చు అని, ఆయన ఇన్నాళ్లూ ఆ విషయాన్ని తమ దగ్గర దాచిపెట్టారని తెలుసుకుని వారు ఆశ్చర్యపోయారు. మహేష్ బాబు నవ్వుతూ, “నాకు మరాఠీ అర్థమవుతుంది” అని చెప్పడంతో తమ సీక్రెట్ లీక్ అయిందని నమ్రత, శిల్పాలు నవ్వుకున్నారట.

“మంచిదైంది, మేము ఆ సమయంలో ఏవైనా పెద్ద రహస్యమైన విషయాలు మరాఠీలో మాట్లాడలేదు, లేకపోతే మా పరిస్థితి ఏమయ్యేదో” అని శిల్పా శిరోద్కర్ నవ్వుతూ చెప్పుకొచ్చారు. ఏదేమైనా మహేష్ బాబు తన వదిన, భార్యను సరదాగా ఇలా ఆటపట్టించడం ఫ్యాన్స్‌కు బాగా నచ్చింది. సూపర్ స్టార్‌కు భాషల పట్ల ఉన్న పట్టు, ఆయన సెన్స్ ఆఫ్ హ్యూమర్ పట్ల నెటిజన్లు ప్రశంసలు కురిపిస్తున్నారు. తన ఫ్యామిలీతో మహేష్ బాబు ఎంత సరదాగా ఉంటారో చెప్పడానికి ఈ సంఘటన ఒక నిదర్శనమని అభిమానులు కామెంట్ చేస్తున్నారు.

Mahesh Babu, Namrata Shirodkar, Shilpa Shirodkar, TeluguOne