TET పరీక్ష పేపర్లు లీక్: ఆగని పరంపర: రేపు ఎగ్జామ్ అనగా.. !!
నీట్ పరీక్ష పేపర్ల లీక్ ఉదంతాన్ని ఇంకా విస్మరించకముందే మరో పరీక్ష పత్రాలు వెలుగులోకి వచ్చాయి. మహారాష్ట్రలో టీచర్ ఎలిజిబిలిటి టెస్ట్ (TET) పరీక్ష పేపర్లు లీక్ అయ్యాయి. లక్షలాదిమంది అభ్యర్థులు ఆదివారం రాష్ట్రవ్యాప్తంగా టెట్ పరీక్ష రాయాల్సి ఉన్న ప్రస్తుత పరిస్థితుల్లో ఈ ఘటన చోటు చేసుకుంది. దీంతో అభ్యర్థుల్లో తీవ్ర అయోమయం, గందరగోళం నెలకొంది. ఈ ఘటనపై మహారాష్ట్ర ప్రభుత్వం విచారణకు ఆదేశించింది.
థానే జిల్లాలో పరీక్షా పత్రం లీకైనట్లు ప్రాథమికంగా అందిన సమాచారాన్ని బట్టి తెలుస్తోంది. ఆదివారం ఈ పరీక్ష జరగాల్సి ఉండగా, అంతకంటే ముందే పేపర్ లీక్ కావడం విద్యాశాఖ భద్రత తీరును ప్రశ్నిస్తోంది. రాష్ట్రవ్యాప్తంగా పరీక్షకు సన్నద్ధమైన లక్షలాది మంది అభ్యర్థుల్లో ఆందోళనలు వ్యక్తమవుతున్నాయి.
ఉపాధ్యాయ వృత్తిలోకి ప్రవేశించాలనుకునే అభ్యర్థులకు ఈ అర్హత పరీక్ష అత్యంత కీలకమైనది. లక్షలాది మంది నిరుద్యోగుల భవిష్యత్తును నిర్ణయించే ఈ పరీక్షా పత్రం ఇంత తేలిగ్గా లీక్ కావడం విద్యా రంగంలో తీవ్ర కలవరాన్ని కలిగిస్తోంది. ఎన్నో నెలలుగా రాత్రింపగళ్లు కష్టపడి చదువుతున్న అభ్యర్థులు ఈ వార్తల వల్ల మానసికంగా తీవ్ర ఆవేదనకు లోనవుతున్నారు. పరీక్షల నిర్వహణ పద్ధతిని మరింత పటిష్టం చేయాలని, తమకు న్యాయం చేయాలని విద్యార్థి సంఘాలు డిమాండ్ చేస్తున్నాయి.
ఈ ఘటనపై మహారాష్ట్ర విద్యాశాఖ ఉన్నతాధికారులు స్పందించారు. సామాజిక మాధ్యమాలలో హల్చల్ చేస్తున్న ప్రశ్నపత్రాల నిజానిజాలను అంచనా వేయడానికి ఒక ఉన్నత స్థాయి దర్యాప్తు కమిటీని ఏర్పాటు చేశారు. ప్రశ్నాపత్ర నిల్వ కేంద్రాల నుంచి గానీ రవాణా సమయంలో గానీ పేపర్ లీక్ జరిగి ఉండొచ్చని భావిస్తోన్నారు. భద్రతా లోపాలు ఎక్కడ తలెత్తాయో తెలుసుకోవడానికి సైబర్ క్రైమ్ పోలీసుల సహాయాన్ని కూడా తీసుకుంటున్నారు.
ఈ ఘటనకు బాధ్యులైన వారిని గుర్తించేందుకు ముమ్మర విచారణ సాగుతోందని అధికారులు తెలిపారు. లీకేజీ నేపథ్యంలో ఆదివారం నాటి పరీక్షను రద్దు చేస్తారా లేక వాయిదా వేస్తారా అనే దానిపై ప్రభుత్వం ఇంతవరకు స్పష్టత ఇవ్వలేదు. ఒక వైపు పరీక్ష రద్దు చేయాలనే డిమాండ్లు వినిపిస్తున్నప్పటికీ, దర్యాప్తు ప్రాథమిక నివేదిక సిద్ధం అయ్యే వరకు అధికారిక ప్రకటన జాప్యం అయ్యేలా కనిపిస్తోంది. అభ్యర్థులు ఎటువంటి ఆందోళనకు లోనుకావద్దని, తాజా పరిణామాలను సమీక్షించి త్వరలో నిర్ణయం వెల్లడిస్తామని విద్యాశాఖ అధికారులు తెలిపారు.
