భారత ఆటోమొబైల్ మార్కెట్లోని సెడాన్ కార్ల విభాగంలో మారుతి సుజుకి డిజైర్ తన తిరుగులేని ఆధిపత్యాన్ని కొనసాగిస్తోంది. ఈ కారు విక్రయాల జోరు ముందు మిగిలిన ఏ బ్రాండ్ కార్లు కూడా పోటీ పడలేకపోతున్నాయి. ఇటీవల విడుదలైన జూన్ 2026 సేల్స్ గణాంకాల ప్రకారం.. గత నెలలో డిజైర్ కారుకు సంబంధించిన మొత్తం 17,899 యూనిట్లు అమ్ముడయ్యాయి.

ఆశ్చర్యకరమైన విషయం ఏంటంటే, ఈ సెగ్మెంట్‌లో టాప్-9 లిస్టులో ఉన్న మిగిలిన 8 కార్ల మొత్తం అమ్మకాలు కలిపినా కూడా కేవలం 13,284 యూనిట్లు మాత్రమే నమోదయ్యాయి. అంటే ఒక్క మారుతి డిజైర్ కారే తన ప్రత్యర్థి కార్లన్నింటినీ కలిపి ఏకంగా 4,615 యూనిట్ల భారీ తేడాతో వెనక్కి నెట్టేసింది. ప్రస్తుతం ఈ సెగ్మెంట్‌లో డిజైర్ ఒంటరిగా 57.40 శాతం మార్కెట్ వాటాను కలిగి ఉంది.

మార్కెట్లో మిగిలిన కార్ల పరిస్థితి ఏంటి?
మారుతి డిజైర్ తర్వాత రెండో స్థానంలో హ్యుందాయ్ ఆరా నిలిచింది. జూన్ 2026లో ఆరా కారుకు సంబంధించి 5,977 యూనిట్లు అమ్ముడవగా, ఇది 19.20 శాతం మార్కెట్ షేర్‌ను దక్కించుకుంది. మూడో స్థానంలో ఉన్న హోండా అమేజ్ 29.20 శాతం వార్షిక వృద్ధిని నమోదు చేస్తూ 2,937 యూనిట్ల విక్రయాలను సాధించింది. అయితే కొన్ని పాపులర్ కార్ల అమ్మకాలు ఈసారి దారుణంగా పడిపోయాయి.

వోక్స్‌వ్యాగన్ వర్టస్ (-32.80%), హ్యుందాయ్ వెర్నా (-31.90%), టాటా టిగోర్ (-23.60%) కార్లు భారీగా మైనస్ గ్రోత్‌ను చూశాయి. స్కోడా స్లావియా 1,083 యూనిట్లతో, హోండా సిటీ 745 యూనిట్లతో తమ ఉనికిని చాటుకోగా, లగ్జరీ మోడల్ టయోటా క్యామ్రీ కేవలం 191 యూనిట్ల అమ్మకాలతో చివరి స్థానంలో నిలిచింది.

ఒకప్పుడు మారుతి కార్లు అంటే సేఫ్టీ తక్కువ అనే అపవాదు ఉండేది. కానీ కొత్త తరం మారుతి డిజైర్ ఆ అంచనాలను పూర్తిగా మార్చేసింది. గ్లోబల్ ఎన్‌క్యాప్, భారత్ ఎన్‌క్యాప్ క్రాష్ టెస్టుల్లో ఈ కారు ప్రతిష్టాత్మక 5-స్టార్ సేఫ్టీ రేటింగ్ సాధించి రికార్డు సృష్టించింది. ఈ కారులోని అన్ని వేరియంట్లలో 6 ఎయిర్‌బ్యాగ్‌లను స్టాండర్డ్‌గా అందిస్తున్నారు. దీనితో పాటు ఎలక్ట్రానిక్ స్టెబిలిటీ కంట్రోల్ , రియర్ పార్కింగ్ సెన్సార్లు, ఈ సెగ్మెంట్‌లోనే మొదటిసారిగా అత్యంత అడ్వాన్సుడ్ 360-డిగ్రీల కెమెరా ఫీచర్‌ను కూడా జోడించారు. అందువల్ల తక్కువ ధరలోనే అత్యంత సురక్షితమైన ప్రయాణాన్ని ఈ కారు అందిస్తోంది.

మారుతి సుజుకి డిజైర్ కారు ప్రారంభ ధర కేవలం రూ.6.25 లక్షల (ఎక్స్-షోరూమ్) నుంచి మొదలై టాప్ వేరియంట్ రూ.9.36 లక్షల వరకు ఉంటుంది. ఈ కారులో కొత్త 1.2-లీటర్, 3-సిలిండర్ నేచురల్లీ ఆస్పిరేటెడ్ పెట్రోల్ ఇంజన్‌ను అమర్చారు. ఇది 80 బ్రేక్ హార్స్‌పవర్ (bhp) శక్తిని, 112 న్యూటన్ మీటర్ల (Nm) గరిష్ట టార్క్‌ను ఉత్పత్తి చేస్తుంది.

ఇది 5-సిలిండర్ మాన్యువల్, ఏఎమ్‌టీ ఆటోమేటిక్ గేర్‌బాక్స్ ఆప్షన్లలో లభిస్తుంది. ముఖ్యంగా మైలేజ్ విషయానికి వస్తే, దీని CNG వేరియంట్ కేజీ గ్యాస్‌కు ఏకంగా 33.73 కిలోమీటర్ల మైలేజీని ఇస్తూ మైలేజ్ ప్రియులను ఎంతగానో ఆకట్టుకుంటోంది.

లుక్స్ మరియు డిజైన్ పరంగా కూడా డిజైర్ చాలా స్టైలిష్‌గా ఉంటుంది. దీని ఫ్రంట్ బంపర్, ఎల్‌ఈడీ హెడ్‌లైట్లు, హారిజాంటల్ డీఆర్‌ఎల్‌లు, వై-షేప్ ఎల్‌ఈడీ టెయిల్ లైట్లు కారుకు స్పోర్టీ లుక్‌ను ఇస్తాయి. ఇంటీరియర్‌లో బేజ్, బ్లాక్ కలర్ థీమ్‌తో పాటు డ్యాష్‌బోర్డ్‌పై చెక్క ముక్కల లాంటి ఫాక్స్ వుడ్ ఫినిషింగ్‌ను ఇచ్చారు.

కారు లోపల సింగిల్ పాన్ సన్‌రూఫ్, ఆండ్రాయిడ్ ఆటో, ఆపిల్ కార్ ప్లే సపోర్ట్ చేసే 9-ఇంచుల లార్జ్ టచ్‌స్క్రీన్ ఇన్ఫోటైన్‌మెంట్ సిస్టమ్, క్రూజ్ కంట్రోల్, అనలాగ్ డ్రైవర్ డిస్‌ప్లే, వెనుక సీట్ల ప్రయాణికుల కోసం రియర్ ఏసీ వెంట్స్ వంటి ఆధునిక ఫీచర్లు ఉన్నాయి. ఈ కారు LXi, VXi, ZXi, ZXi Plus అనే నాలుగు ట్రిమ్స్‌లో మార్కెట్లో లభ్యమవుతోంది.