అమెరికాలో క్యాంపస్ ఓపెన్ చేయబోతున్న భారతీయ ఐఐటీ..!
భారతీయ ఐఐటీలకు అంతర్జాతీయంగా మంచి పేరుంది. ఇక్కడ పూర్తి చేసిన డిగ్రీలకు సైతం పలు దేశాల్లో మంచి గుర్తింపు ఉంది. అయితే విదేశీ యూనివర్శిటీలు భారత్ కు వచ్చి క్యాంపస్ లు పెడుతున్నంత వేగంగా ఇక్కడి వర్సిటీలు విదేశాల్లోకి ఎంటర్ కాలేకపోతున్నాయి. దీంతో లోపం ఎక్కడుందనే చర్చ జరుగుతూనే ఉంది. దీనికి చెక్ పెట్టేలా తాజాగా ఓ భారతీయ ఐఐటీ విదేశాల్లో తమ సబ్ క్యాంపస్ ఏర్పాటు చేసేందుకు సిద్దమైంది. ఈ మేరకు ప్రకటన కూడా చేసింది.
ఇండియన్ ఇన్స్టిట్యూట్ ఆఫ్ టెక్నాలజీ, బొంబాయి (IIT Bombay) విదేశాల్లో తన మొట్టమొదటి ఉప-క్యాంపస్ను ఏర్పాటు చేసేందుకు సిద్ధమైంది. అమెరికాలో ఈ క్యాంపస్ ఏర్పాటు చేస్తున్నట్లు ప్రకటించింది. ఇది ఓల్డ్ వెస్ట్బరీలోని స్టేట్ యూనివర్సిటీ ఆఫ్ న్యూయార్క్ (SUNY) సహకారంతో నిర్వహించే క్యాంపస్. 2027 నుండి సర్టిఫికేట్ కోర్సులను అందించడంతో ప్రారంభించి, భవిష్యత్తులో పూర్తిస్థాయి డిగ్రీ ప్రోగ్రామ్లను అభివృద్ధి చేయాలని ఐఐటీ బోంబే యోచిస్తోంది. ఇవి అమెరికా, భారతదేశంలోని విద్యార్థులతో సహా ప్రపంచవ్యాప్తంగా ఉన్న విద్యార్థులకు అందుబాటులో ఉంటాయి.
ఐఐటి బొంబాయి డైరెక్టర్ ప్రొఫెసర్ శిరీష్ కేదారే, SUNY ఓల్డ్ వెస్ట్బరీ ప్రెసిడెంట్ డాక్టర్ తిమోతీ ఇ సామ్స్ సంతకం చేసిన లెటర్ ఆఫ్ ఇంటెంట్ ద్వారా, న్యూయార్క్లోని లాంగ్ ఐలాండ్ క్యాంపస్లో అందించనున్న కొత్త విద్యా, పరిశోధన అవకాశాల అభివృద్ధిలో భాగస్వామ్యం కావడానికి ఈ రెండు సంస్థలు అంగీకరించాయని ఆ సంస్థ జారీ చేసిన మీడియా ప్రకటనలో పేర్కొంది.
ఆర్టిఫిషియల్ ఇంటెలిజెన్స్ వంటి అభివృద్ధి చెందుతున్న రంగాలపై దృష్టి సారించి, సైన్స్, ఇంజనీరింగ్లోని అన్ని స్థాయిలలో కొత్త విద్యా కోర్సులను రూపొందించే పనితో పాటు, ఈ భాగస్వామ్యం సహకార పరిశోధన కార్యకలాపాల కోసం ప్రణాళికలను అభివృద్ధి చేయనుంది. ప్రస్తుతం ఐఐటీ మద్రాస్ కు టాంజానియాలోని జాంజిబార్ లో, ఐఐటీ ఢిల్లీకి యూఏఈలోని అబుదాబీలో మాత్రమే విదేశీ క్యాంపస్ లు ఉన్నాయి. ఇప్పుడు ఐఐటీ బోంబే అమెరికా క్యాంపస్ లో వీటి సరసన చేరనుంది.
