పాన్ ఇండియా స్టార్ ప్రభాస్ రేంజ్ రోజురోజుకూ సరికొత్త శిఖరాలను తాకుతోంది. ‘బాహుబలి’ సినిమాతో మొదలైన ఆయన బాక్సాఫీస్ ప్రభంజనం, ఆ తర్వాత వచ్చిన ప్రతి చిత్రంతోనూ నార్త్ బెల్ట్‌తో పాటు అంతర్జాతీయ మార్కెట్‌లో సరికొత్త రికార్డులను సృష్టిస్తూనే ఉంది. ప్రస్తుతం క్లాసిక్ సినిమాల దర్శకుడు హను రాఘవపూడి కాంబినేషన్‌లో ప్రభాస్ నటిస్తున్న ప్రతిష్టాత్మకమైన పీరియాడిక్ యాక్షన్ డ్రామా ‘ఫౌజీ’. 

సెకండ్ వరల్డ్ వార్ టైంలో, దేశభక్తి నేపథ్యంలో సాగే ఒక అద్భుతమైన ప్రేమకథగా రూపుదిద్దుకుంటున్న ఈ చిత్రంపై అటు ట్రేడ్ వర్గాల్లో, ఇటు ప్రేక్షకుల్లో అంచనాలు ఆకాశాన్ని తాకుతున్నాయి. ప్రభాస్ తన కెరీర్‌లో ఇప్పటివరకు టచ్ చేయని సరికొత్త జోనర్ కావడంతో ఈ ప్రాజెక్ట్‌పై ట్రేడ్ మార్కెట్‌లో మునుపెన్నడూ లేని విధంగా భారీ క్రేజ్ నెలకొంది. ఈ క్రేజ్‌ను నిజం చేస్తూ, సినిమా షూటింగ్ ఇంకా చివరి దశలో ఉండగానే ‘ఫౌజీ’ బిజినెస్ వేట అత్యంత గ్రాండ్‌గా మొదలైంది. తాజాగా ఈ సినిమాకు సంబంధించి కొన్ని మేజర్ థియేట్రికల్ డీల్స్ మైండ్ బ్లోయింగ్ ఫ్యాన్సీ రేట్లకు క్లోజ్ అయినట్లు ఇండస్ట్రీ వర్గాల నుండి సమాచారం అందుతోంది.

ముఖ్యంగా నార్త్ ఇండియాలో ప్రభాస్ సినిమాలకు ఉండే డిమాండ్ గురించి ప్రత్యేకంగా చెప్పాల్సిన అవసరం లేదు. ఈ క్రేజ్‌ను క్యాష్ చేసుకునేందుకు బాలీవుడ్ అగ్ర నిర్మాణ సంస్థలు ఎప్పుడూ ముందుంటాయి. ఇప్పుడు ‘ఫౌజీ’ నార్త్ ఇండియా థియేట్రికల్ హక్కులను ప్రముఖ డిస్ట్రిబ్యూటర్ అనిల్ తడానికి చెందిన ‘AA Films’ సంస్థ అత్యంత భారీ ఫ్యాన్సీ రేటుకు దక్కించుకుంది. బాహుబలి, సాహో, కల్కి లాంటి తిరుగులేని మైలురాయి చిత్రాల నుంచి ప్రభాస్‌తో ఉన్న విజయవంతమైన అనుబంధాన్ని కొనసాగిస్తూ ఏఏ ఫిల్మ్స్ ఈ భారీ డీల్‌ను లాక్ చేయడం విశేషం. నార్త్ బెల్ట్‌లో ఈ సినిమాను మునుపెన్నడూ లేని విధంగా చాలా గ్రాండ్‌గా రిలీజ్ చేయడానికి డిస్ట్రిబ్యూషన్ రంగంలో భారీ ప్లానింగ్ జరుగుతోంది. 

కేవలం నార్త్ ఇండియాలోనే కాకుండా, ఓవర్సీస్ మార్కెట్‌లోనూ ‘ఫౌజీ’ బిజినెస్ సరికొత్త సంచలనాలకు తెరలేపింది. ప్రముఖ నిర్మాణ, పంపిణీ సంస్థ ‘హోంబాలే ఫిల్మ్స్’ ఈ చిత్రానికి సంబంధించిన ఓవర్సీస్ థియేట్రికల్ రైట్స్ ను భారీ ధర చెల్లించి సొంతం చేసుకుంది. నార్త్ అమెరికాలో ‘ప్రత్యంగిరా సినిమాస్’ ద్వారా ఈ సినిమా భారీ ఎత్తున విడుదల కానుంది.

మైత్రీ మూవీ మేకర్స్ ఎంతో ప్రతిష్టాత్మకంగా నిర్మిస్తున్న ఈ పీరియాడిక్ లవ్ స్టోరీలో ప్రభాస్ సైనికుడి పాత్రలో కనిపించబోతున్నారని టాక్ నడుస్తోంది. ఈ చిత్రంలో ప్రభాస్ సరసన ఇమాన్వి హీరోయిన్‌గా నటిస్తుండగా, ప్రతి ఫ్రేమ్ విజువల్ వండర్‌గా ఉండేలా దర్శకుడు హను రాఘవపూడి ప్లాన్ చేస్తున్నారు. సినిమా రిలీజ్‌కు ముందే ఈ స్థాయిలో థియేట్రికల్ డీల్స్ క్లోజ్ అవ్వడం రెబల్ స్టార్ బాక్సాఫీస్ స్టామినాకు నిదర్శనమని ట్రేడ్ విశ్లేషకులు అభిప్రాయపడుతున్నారు.

Prabhas, Fauzi Movie, Business, AA Films, Hombale Films