posted on Sep 18, 2024 11:06AM
ప్రముఖ కొరియోగ్రాఫర్ జానీ మాస్టర్ కోసం నార్సింగ్ పోలీసులు గాలిస్తున్నారు. ప్రస్తుతం ఆయన నెల్లూరులో ఉన్నట్లు సమాచారం. జాని మాస్టర్ దగ్గర పని చేస్తున్న 21 ఏళ్ల మహిళా అసిస్టెంట్ కొరియోగ్రాఫర్ పోలీసులకు ఫిర్యాదు చేసిన సంగతి తెలిసిందే. జాని మాస్టర్ పై నాన్ బెయిల్ కేసు నమోదైన నేపథ్యంలో బుధవారం నార్సింగ్ పోలీసులు బాధిత యువతి స్టేట్ మెంట్ రికార్డు చేశారు. ఈ కేసు నమోదైన తర్వాత జానిమాస్టర్ హైద్రాబాద్ లోని తన ఇంటి నుంచి పారిపోయాడని పోలీసువర్గాలు తెలిపాయి. త్వరలో అరెస్ట్ చేయడానికి ప్రత్యేక టీంలను ఏర్పాటు చేసినట్లు ఆ వర్గాలు పేర్కొన్నాయి. సంచలనం సృష్టించిన ఈ కేసు వివరాలు తెలుసుకోవడానికి వివిధ మీడియా సంస్థల ప్రతినిధులు జాని మాస్టర్ ఇంటికి చేరుకుంటున్నారు. గత రెండురోజులుగా జానీ మాస్టర్ పత్తాలేకపోవడంతో ఫలితం లేకుండా పోయింది. సెక్స్ ఆరోపణలు రావడంతో తమ పార్టీ నుంచి జాని మాస్టర్ ను సస్పెండ్ చేసిన జనసేన బాధిత యువతికి అండగా నిలిచింది. బాధిత యువతి ఫిర్యాదుమేరకు జాని మాస్టర్ భార్య కూడా ఈ నేరానికి సహకరించినట్లు తెలుస్తోంది.
