posted on Aug 22, 2024 4:35PM
నిరుద్యోగ సమస్య మీద బిఆర్ఎస్ ప్రభుత్వంపై పోరాడి కొల్లాపూర్ అసెంబ్లీ నియోజకవర్గం నుంచి ఇండిపెండెంట్ గా పోటీ చేసి ఓడిపోయిన బర్రెలక్క మళ్లీ సోషల్ మీడియాలో వైరల్ అయ్యింది
కర్నె శిరీష అంటే గుర్తు ప‌ట్ట‌డం కొంచెం క‌ష్టంగానీ, అదే బర్రెలక్క అంటే అంద‌రూ చాలా ఈజీగా గుర్తు ప‌డ‌తారు. ఒక్క వీడియోతో రాత్రికి రాత్రే సోషల్ మీడియా సెల‌బ్రిటీగా మారిపోయారామె. ఇక ఇటీవ‌ల తెలంగాణ అసెంబ్లీ ఎన్నికల్లో పోటీ చేయడంతో ఆమె గురించి చాలా మందికి తెలిసింది. నిరుద్యోగుల తరఫున ఎన్నికల బరిలో నిలిచిన బర్రెలక్కకు చాలా మంది మద్దతిచ్చారు కూడా. దీంతో రెండు తెలుగు రాష్ట్రాల్లో ఆమె పేరు మార్మోగిపోయింది. అయితే, తాజాగా ఆమె తాలూకు ఓ వీడియో నెట్టింట బాగా వైరల్ అవుతోంది. అందులో బర్రెలక్క క‌న్నీరు పెట్టుకుంటూ.. తాను ఏ తప్పు చేయలేద‌ని, అతనెవరో కూడా తనకు తెలియ‌ద‌ని చెప్పడం వీడియోలో క‌నిపించింది.
కన్నడకు చెందిన ఓ ప్రముఖ ఛానెల్‌ బర్రెలక్క.. తన ఫేస్బుక్ ఖాతా ద్వారా ఎవరో ఒక వ్యక్తి దగ్గర నుంచి డబ్బులు తీసుకుని మోసం చేసిందని వార్తలను ప్రసారం చేసింది. ఆ వార్త‌ల‌లో తన ఫొటోలతో పాటు, పేరు కూడా ప్రస్తావించింది. పైగా బాధితుడు కూడా తనను ఆమె మోసం చేసిందని చెప్పడం గ‌మ‌నార్హం.
దాంతో ఇప్పుడీ వార్త నెట్టింట బాగా వైర‌ల్‌గా మారింది. చివ‌రికి బర్రెలక్క దృష్టికి కూడా వచ్చింది. దాంతో షాక్ అవ్వ‌డం ఆమె వంతైంది. ఇలా త‌న‌పై సోషల్ మీడియాలో త‌ప్పుడు వార్త హ‌ల్‌చల్ చేయ‌డంపై ఆమె స్పందించింది. ఇదంతా ఫేక్‌ అని, ఆ వ్యక్తి ఎవరో కూడా తనకు తెలియదంటూ క‌న్నీటిప‌ర్యంత‌మైంది. తాను ఎవరి దగ్గర కూడా డబ్బులు తీసుకోలేదని చెప్పుకొచ్చింది. ఈ మేరకు ఇన్‌స్టాలో ఓ వీడియోను బర్రెలక్క పోస్ట్‌ చేసింది.
‘‘ఇప్పుడే ఓ వార్త చూశాను. ఇది ఏ ఛానెలో కూడా నాకు తెలియదు. ఏదో కన్నడ ఛానెల్‌ అని తెలుస్తుంది. ఇలాంటి త‌ప్పుడు వార్త‌ను ఎందుకు స్ప్రెడ్‌ చేస్తున్నారో నాకు అర్థం కావడం లేదు. ఫేస్‌బుక్‌లో చాట్‌ చేసి డబ్బులు దోచుకుందని వార్తలు వేస్తున్నారు. అసలేం జరుగుతుందో నాకు అర్థం కావడం లేదు. ఆయ‌నెవ‌రో ముస‌లాయ‌న.. అతనెవరో కూడా నాకు తెలియదు. కొందరు కావాలనే ఇలా నా జీవితంతో ఆడుకుంటున్నారు. నా పేరు మీద ఫేస్బుక్, ఇన్‌స్టాగ్రామ్‌లలో చాలా న‌కిలీ ఖాతాలు ఉన్నాయి. అందులో ఎవరు ఇలాంటి పని చేశారో నాకు తెలియదు. నేనేం తప్పు చేయలేదు’’ అని బోరున ఏడ్చేసిందామె. ఇక ఈ త‌ప్పుడు వార్తలను ప్రచారం చేస్తున్న ఛానెల్‌పై ఆమె అక్క‌డి పోలీసుల‌కు ఫిర్యాదు చేసిన‌ట్లు, వారితో మాట్లాడిన ఆడియోను కూడా వినిపించింది.
